महाळुंगे-चाकण MIDC वाहतूक कोंडीविरोधात विद्यार्थिनी मैदानात; गणेश बोत्रेंच्या साखळी उपोषणाला पाठिंबा

महावार्ता लाईव्ह | महाळुंगे - चाकण एमआयडीसी परिसरातील वाढती वाहतूक कोंडी, रस्त्यांवरील खड्डे, खराब रस्ते आणि वाहतुकीच्या विविध समस्यांकडे प्रशासनाचे लक्ष वेधण्यासाठी जिल्हा परिषद सदस्य गणेश बोत्रे यांच्या नेतृत्वाखाली महाळुंगे येथील एचपी चौकात गेल्या दोन दिवसांपासून साखळी उपोषण सुरू आहे. आज या आंदोलनाचा तिसरा दिवस असून, आंदोलनाला नागरिकांसह शाळकरी विद्यार्थिनींनीही भेट देत आपला पाठिंबा दर्शविला.

महाळुंगे–चाकण एमआयडीसी परिसरात दररोज मोठ्या प्रमाणावर कामगार, विद्यार्थी, स्थानिक नागरिक तसेच अवजड वाहनांची ये-जा सुरू असते. मात्र, रस्त्यांची झालेली दुरवस्था आणि वाढती वाहतूक यामुळे नागरिकांना मोठ्या प्रमाणात त्रास सहन करावा लागत आहे. अनेक ठिकाणी रस्त्यावर खड्डे पडल्याने वाहतुकीचा वेग मंदावतो आणि त्यातच वाहनांची मोठी संख्या असल्याने वाहतूक कोंडीची समस्या दिवसेंदिवस गंभीर होत आहे.

या प्रश्नांवर प्रशासनाने तातडीने उपाययोजना कराव्यात, रस्त्यांची दुरुस्ती करावी तसेच चाकण एमआयडीसी परिसरातील वाहतूक कोंडी कायमस्वरूपी सोडविण्यासाठी ठोस नियोजन करावे, या मागण्यांसाठी गणेश बोत्रे यांच्या नेतृत्वाखाली साखळी उपोषण सुरू करण्यात आले आहे.

आंदोलनाच्या तिसऱ्या दिवशी विद्यार्थिनींची उपस्थिती

आज आंदोलनाच्या तिसऱ्या दिवशी शाळकरी विद्यार्थिनींनी उपोषणस्थळी भेट देत आंदोलनाला पाठिंबा दिला. वाहतूक कोंडी आणि रस्त्यांवरील खड्ड्यांचा फटका केवळ वाहनचालक व कामगारांनाच नाही, तर शाळेत ये-जा करणाऱ्या विद्यार्थ्यांनाही बसत असल्याचे यावेळी विद्यार्थिनींनी अधोरेखित केले.

शाळकरी विद्यार्थ्यांनी आंदोलनस्थळी उपस्थित राहून चाकण परिसर वाहतूक कोंडीमुक्त करण्याच्या मागणीला पाठिंबा दिला. यावेळी विद्यार्थ्यांनी घोषणाबाजी करत प्रशासनाचे लक्ष या गंभीर समस्यांकडे वेधले.

‘वाहतूक कोंडीमुक्त चाकण’साठी विद्यार्थ्यांचाही आवाज

चाकण एमआयडीसी परिसरातील वाहतूक कोंडीचा प्रश्न दिवसेंदिवस गंभीर होत असताना आता या प्रश्नासाठी शाळकरी विद्यार्थीही मैदानात उतरल्याचे चित्र पाहायला मिळाले. रस्त्यांवरील खड्डे, वाहतूक कोंडी आणि अपुऱ्या वाहतूक व्यवस्थेमुळे नागरिकांच्या दैनंदिन जीवनावर परिणाम होत असून, या समस्येवर कायमस्वरूपी तोडगा काढण्याची मागणी जोर धरत आहे.

जिल्हा परिषद सदस्य गणेश बोत्रे यांच्या नेतृत्वाखाली सुरू असलेल्या साखळी उपोषणाला विविध संघटना, नागरिक आणि स्थानिकांकडून पाठिंबा मिळत असतानाच विद्यार्थ्यांनीही आंदोलनाला दिलेला पाठिंबा प्रशासनासाठी लक्षवेधी ठरत आहे. त्यामुळे महाळुंगे–चाकण एमआयडीसीतील वाहतूक कोंडी आणि रस्त्यांच्या प्रश्नावर प्रशासन आता कोणती भूमिका घेणार, याकडे परिसरातील नागरिकांचे लक्ष लागले आहे.

.