Big Update from Shri Kshetra Bhimashankar! | श्रावणात श्री क्षेत्र भीमाशंकर मंदिर ५ ते रात्री ९.३० वाजेपर्यंत भाविकांसाठी खुले; प्रशासनाकडून जय्यत तयारी

महावार्ता लाईव्ह | श्रावण मासाच्या पार्श्वभूमीवर देशभरातून श्री क्षेत्र भीमाशंकर येथे दर्शनासाठी येणाऱ्या भाविकांची मोठी गर्दी लक्षात घेता प्रशासनाने भाविकांच्या सोयी-सुविधा आणि सुरक्षिततेसाठी आवश्यक नियोजन सुरू केले आहे. याच पार्श्वभूमीवर जिल्हाधिकारी कार्यालयात आज विशेष बैठक घेण्यात आली. या बैठकीत भीमाशंकर देवस्थान परिसरातील विविध विकासकामे, दर्शन व्यवस्था, वाहतूक नियोजन, भाविकांची सुरक्षितता तसेच आवश्यक मूलभूत सुविधांबाबत सविस्तर चर्चा करण्यात आली.

श्री क्षेत्र भीमाशंकर येथे सध्या विविध विकासकामे सुरू असल्याने भाविकांच्या दर्शनाच्या वेळेत काही मर्यादा करण्यात आल्या होत्या. मात्र, श्रावण महिन्यात भाविकांची संख्या मोठ्या प्रमाणात वाढण्याची शक्यता असल्याने श्रावण महिन्याच्या पहिल्या दिवसापासून श्री भीमाशंकर मंदिर पूर्णवेळ भाविकांसाठी खुले ठेवण्याचा निर्णय बैठकीत घेण्यात आला.

त्यानुसार पहाटे सकाळी ५ वाजल्यापासून रात्री ९.३० वाजेपर्यंत भाविकांना मंदिरात दर्शन घेता येणार आहे. त्यामुळे दूरवरून येणाऱ्या भाविकांना दर्शनासाठी अधिक वेळ उपलब्ध होणार असून, गर्दीचे नियोजन करण्यासही प्रशासनाला मदत होणार आहे.

भाविकांच्या सुरक्षिततेला प्राधान्य

श्रावण महिन्यात भीमाशंकर येथे महाराष्ट्रासह देशाच्या विविध भागांतून मोठ्या संख्येने भाविक दाखल होतात. विशेषतः श्रावणी सोमवार, नागपंचमी आणि इतर धार्मिक दिवसांमध्ये गर्दी वाढण्याची शक्यता असते. या पार्श्वभूमीवर भाविकांच्या सुरक्षिततेसाठी पोलिस बंदोबस्त, वाहतूक नियोजन, दर्शन रांगेचे व्यवस्थापन आणि आपत्कालीन परिस्थितीत आवश्यक उपाययोजना यावर बैठकीत चर्चा करण्यात आली.

मंदिर परिसरात भाविकांना कोणत्याही प्रकारचा त्रास होऊ नये, गर्दीमुळे वाहतुकीवर परिणाम होऊ नये तसेच दर्शन व्यवस्था सुरळीत राहावी यासाठी संबंधित विभागांनी समन्वयाने काम करण्याच्या सूचना देण्यात आल्या.

धार्मिक पर्यटनाला मिळणार चालना

श्री क्षेत्र भीमाशंकर हे ज्योतिर्लिंग क्षेत्र असल्याने श्रावण महिन्यात या ठिकाणी भाविकांची विशेष गर्दी असते. मंदिर अधिक वेळ खुले राहणार असल्यामुळे भाविकांना सोयीस्करपणे दर्शन घेता येणार आहे. त्याचबरोबर भीमाशंकर परिसरातील धार्मिक पर्यटनालाही यामुळे चालना मिळण्याची अपेक्षा आहे.

भाविकांच्या सोयीसाठी पिण्याचे पाणी, स्वच्छता, आरोग्य सुविधा, पार्किंग, वाहतूक व्यवस्था आणि इतर आवश्यक बाबींचे नियोजन करण्यावरही बैठकीत भर देण्यात आला.

बैठकीस मान्यवरांची उपस्थिती

या बैठकीस माजी मंत्री तथा आंबेगावचे आमदार दिलीप वळसे पाटील, खेडचे आमदार बाबाजी काळे, जिल्हाधिकारी जितेंद्र डूडी, जिल्हा परिषदेचे मुख्य कार्यकारी अधिकारी गजानन पाटील, पोलिस अधीक्षक संदीप सिंह गिल, आंबेगाव-जुन्नर उपविभागीय अधिकारी अर्चना तांबे, देवस्थानचे अध्यक्ष सुरेश कौदरे, कार्यकारी विश्वस्त मधुकर गवांदे, रत्नाकर कोडिलकर यांच्यासह संबंधित विभागांचे अधिकारी व मान्यवर उपस्थित होते.

श्रावण महिन्यात भीमाशंकर येथे येणाऱ्या भाविकांना सुरक्षित, शिस्तबद्ध आणि सुलभ दर्शन मिळावे, यासाठी प्रशासन, पोलिस यंत्रणा आणि देवस्थान प्रशासनाकडून समन्वयाने नियोजन करण्यात येत आहे.