Maval Pune News | भारत केसरी ओम्या बैलाचा मृत्यू; बैलगाडा विश्वावर शोककळा

महावार्ता लाईव्ह | पुणे जिल्ह्यातील मावळ तालुक्यातील वारंगवाडी येथील आणि संपूर्ण महाराष्ट्रातील बैलगाडा शर्यतींच्या विश्वात आपल्या वेग, ताकद आणि सातत्यपूर्ण कामगिरीच्या जोरावर वेगळी ओळख निर्माण करणारा ‘प्रथम भारतकेसरी ओम्या’ बैल याचे दुःखद निधन झाले. ओम्याच्या निधनाची बातमी समोर येताच बैलगाडा शर्यतप्रेमी, बैलगाडा मालक, शौकीन आणि चाहत्यांमध्ये हळहळ व्यक्त करण्यात आली. सोशल मीडियावरही ओम्याच्या आठवणींना उजाळा देणाऱ्या भावनिक पोस्ट मोठ्या प्रमाणावर व्हायरल होत आहेत.

पोटच्या लेकराप्रमाणे जपला ओम्या

वारंगवाडी येथील रामनाथ विष्णू वारंगे यांचा ओम्या हा अत्यंत लाडका बैल होता. कुटुंबातील सदस्याप्रमाणे त्याची काळजी घेत त्याला जपण्यात आले. बैलगाडा घाटावर उतरल्यानंतर त्याचा वेग, ताकद आणि धावण्याची शैली पाहण्यासाठी शौकिनांची मोठी गर्दी होत असे.

ओम्याने आपल्या कारकिर्दीत महाराष्ट्रातील अनेक प्रतिष्ठेच्या बैलगाडा शर्यतींमध्ये दमदार कामगिरी करत विजय मिळवले. त्यामुळे अल्पावधीतच तो बैलगाडा शर्यतींच्या विश्वातील चर्चेचा आणि आकर्षणाचा केंद्रबिंदू ठरला.

जेसीबीपासून थारपर्यंत बक्षिसांचा मानकरी 

ओम्याच्या नावावर अनेक प्रतिष्ठेच्या शर्यतींचे विजय जमा झाले होते. विविध स्पर्धांमध्ये त्याने जेसीबी, थार, बोलेरो, ट्रॅक्टर, बुलेट मोटारसायकल, सोन्याची बक्षिसे तसेच मोठ्या रकमेची रोख बक्षिसे मिळवत आपला दबदबा निर्माण केला होता.

त्याच्या या कामगिरीमुळे बैलगाडा शर्यतीच्या क्षेत्रात ओम्याला विविध बिरुदांनी गौरवण्यात आले. ‘मोठ्या मैदानाचा मोठा वस्ताद’, ‘तुफान गतीचा बेताज बादशहा’, ‘मावळची राजधानी एक्सप्रेस’, ‘महाराष्ट्र केसरी’ आणि ‘बैलगाडा क्षेत्राचा कोहिनूर’ अशा शब्दांत त्याचे वर्णन केले जात होते.

घाटावर ओम्याची बारी म्हणजे शौकिनांसाठी पर्वणी

बैलगाडा घाटावर ओम्याची बारी लागली की शौकिनांमध्ये विशेष उत्साहाचे वातावरण निर्माण होत असे. ओम्याचा वेग पाहण्यासाठी दूरदूरवरून बैलगाडा प्रेमी घाटावर दाखल होत असत.

धावण्याच्या वेळी त्याचा वेग आणि प्रतिस्पर्ध्यांवर मिळवलेली आघाडी यामुळे ओम्याने अनेकांच्या मनात अढळ स्थान निर्माण केले. त्यामुळे त्याचा केवळ एक बैल म्हणून नव्हे, तर बैलगाडा शर्यतीच्या विश्वातील एक मानकरी आणि स्टार म्हणून उल्लेख केला जात असे.

सोशल मीडियावर भावनिक श्रद्धांजली

ओम्याच्या निधनाची बातमी समोर आल्यानंतर सोशल मीडियावर चाहत्यांनी भावनिक श्रद्धांजली वाहण्यास सुरुवात केली. ओम्याचे जुने शर्यतीतील व्हिडिओ, फोटो आणि त्याच्या विजयांच्या आठवणी पुन्हा मोठ्या प्रमाणावर शेअर केल्या जात आहेत.

‘ओम्या तू परत ये’, ‘घाटाचा ढाण्या वाघ हरपला’, ‘बैलगाडा शर्यतीचा बादशहा काळाच्या पडद्याआड’ अशा भावनिक प्रतिक्रिया चाहत्यांकडून व्यक्त होत आहेत.

मन्यानंतर ओम्याच्या निधनाने बैलगाडा विश्वाला दुसरा मोठा धक्का

बैलगाडा शर्यतीच्या विश्वाला गेल्या काही काळात दोन मोठे धक्के बसले आहेत. दोन वर्षांपूर्वी जवळेकर कुटुंबीयांचा प्रसिद्ध ‘हिंदकेसरी मन्या’ बैलाचे निधन झाले होते. आता भारतकेसरी ओम्याच्या निधनाने बैलगाडा प्रेमींच्या दुःखात आणखी भर पडली आहे.

मन्या आणि ओम्या या दोन्ही नामांकित बैलांनी आपल्या वेगवान कामगिरीने बैलगाडा शर्यतीच्या इतिहासात आपला ठसा उमटवला. त्यामुळे त्यांच्या निधनामुळे बैलगाडा शर्यतीच्या विश्वातील एका सुवर्ण पर्वाची आठवण कायम राहणार असल्याची भावना शौकिनांमधून व्यक्त होत आहे.

ओम्याच्या आठवणी कायम राहणार

ओम्याने आपल्या कारकिर्दीत मिळवलेले विजय, घाटावर निर्माण केलेला दबदबा आणि त्याच्यावर प्रेम करणाऱ्या शौकिनांची मोठी फौज यामुळे त्याचे नाव बैलगाडा शर्यतीच्या इतिहासात कायम स्मरणात राहणार आहे.

वेगाचा बादशहा, मैदानाचा वस्ताद आणि मावळची राजधानी एक्सप्रेस म्हणून ओळखला जाणारा भारतकेसरी ओम्या आता काळाच्या पडद्याआड गेला असला, तरी त्याच्या धावण्याच्या आठवणी आणि गाजवलेले घाट बैलगाडा प्रेमींच्या मनात कायम जिवंत राहतील.